መጻሕፍት

‹‹ተሰአሎ ለአቡከ ወይነግረከ ››

አባትህን ጠይቀው ይነግርኻል  ዘዳ. 32፥ 7

በሚል የተዘጋጀ ዐሥራ አራት ምዕራፎችና ክፍሎችም የያዘ 338 ገጽ ሆኖ የመጽሐፉ ይዘትም ወቅቱን የዋጀ በታሪክና በሃይማኖት ዙርያ የተጻፈ ነው። ለግንዛቤ ይረዳ ዘንድም ማወጫውንና መቅድሙን መግቢያውን።

እነሆ

ማውጫ

  ርዕስ                                     ገጽ

መቅድም…………………………………………………………………. 1

መግቢያ………………………………………………………………….. 7

ምዕራፍ አንድ ሃይማኖት ምንድን ነው?……………………….. 9

ሀ. የተስፋው ቃል የታመነ ነው……………………………… 20

ለ. በተስፋ መጽናት……………………………………………. 31

ሐ. የእግዚአብሔርን ቃል መስማትና መታዘዝ…………….. 37

መ. ፍቅር የሌለው እግዚአብሔርን አያውቀውም…………… 41

ምዕራፍ ሁለት ኢትዮጵያዊ መልኩን፤ነብር ዝንጉርጉርነቱን

ይለውጥ ዘንድ ይችላልን?……………………….. 53

ሀ. ኢትዮጵያ ቅድመ ልደተ ክርስቶስ……………………….. 61

ለ. ነገደ ካም (ነገደ ኵሽ)……………………………………… 63

ሐ. ኢትዮጵያ በመጽሐፍ ቅዱስ……………………………… 64

መ. ኢትዮጵያ በሕገ ኦሪት……………………………………. 67

ሠ. ኢትዮጵያ ድኅረ ልደተ ክርስቶስ………………………… 79

ምዕራፍ ሦስት ጸረ-ኢትዮጵያ ኦርቶዶክስ ተዋሕዶ ቤተ ክርስቲያን

የሐሰት ትምህርት በቃለ እግዚአብሔር ሲመዘን…. 87

ሀ. ትክክለኛ እምነት ያላት ቤተ ክርስቲያን ፈተናዋ

ለምን በዛ?…………………………………………………. 99

ለ. ማርቲን ሉተር በሮሜ መጽሐፍ ቅዱስ ውስጥ………… 100

ማውጫ

ርዕስ                                      ገጽ

ሐ. በቅኝ ግዛት ዘመን ያለው መጽሐፍ ቅዱስ……………… 101

መ. በኢትዮጵያ የሃይማኖት ለውጥ ለምን አስፈለገ?……… 102

ሠ. በሃይማኖት (በባህል) ለውጥ ምክንያት የሚፈጠር

የአእምሮ ግጭት………………………………………….. 109

ምዕራፍ አራት   በኢትዮጵያውያን ኦርቶዶክስ ተዋሕዶ ቤተ

ክርስቲያን ሊቃውንት የአንድነትና ሦስትነት

አስተምህሮ (ምስጢረ ሥላሴ)………………… 114

ሀ. የምስጢረ ሥላሴን  ትምህርት የገለጸልን  አምላካችን

ፈጣሪያችን ነው……………………………………………. 119

ምዕራፍ አምስት የጌታችን የመድኃኒታችን የኢየሱስ ክርስቶስ

ስብከት…………………………………………………… 123

ሀ. የጌታ ትንሣኤ……………………………………………… 128

ለ. ምሥጢረ ቊርባን የሕይወት እንጀራ እኔ ነኝ!…………. 130

ሐ. ለምስጢረ ቊርባን የሥጋውና የደሙ አማናዊነት…….. 132

ምዕራፍ ስድስት ጌታችን መድኃኒታችን ኢየሱስ ክርስቶስ

የአምላክ ልጅ አይደለም ለሚሉ………………. 136

ሀ. ኢየሱስ ክርስቶስ እግዚአብሔር ነው…………………….. 151

ለ. ልደተ አምላክ………………………………………………. 154

ማውጫ

  ርዕስ                                       ገጽ

ሐ. በኢየሱስ የዘር ሐረግ ግራ መጋባት…………………….. 162

መ. ኢየሱስ ክርስቶስ ፍጹም አምላክ ፍጹም ሰው ነው…… 168

ምዕራፍ ሰባት ስለ እመቤታችን ቅድስት ድንግል ማርያም

ዘለዓለማዊ ድንግልና የነቢያት ትንቢትና

የሊቃውንት ትርጓሜ……………………………. 190

ሀ. የወላዲተ አምላክ ቅድስት ድንግል ማርያም

አማላጅነት………………………………………………….. 192

ለ. እመቤታችን ጥንተ አብሶ (የአዳም በደል) የለባትም……. 198

ምዕራፍ ስምንት የቅዱሳን አማላጅነት…………………………. 203

ምዕራፍ ዘጠኝ ስለ ቅዱሳን መላእክት ማማለዳቸው…………… 211

ሀ. ለመላእክት ስለሚገባው ስግደት………………………….. 213

ለ. ታቦት በሐዲስ ኪዳን የጸና ስለመሆኑ…………………… 214

ሐ. “ከሐሰተኞች መምሕራን (መናፍቃን) ተጠበቁ”………… 219

መ. ስለ ጾም……………………………………………………. 224

ሠ. ሰማዕታተ ጽድቅ………………………………………….. 228

ረ. ቅዱስ……………………………………………………….. 234

ሰ. የክርስቲያናዊ ማንነት መለያ ማተብ…………………….. 241

ማውጫ

  ርዕስ                                       ገጽ

ምዕራፍ ዐሥር የተለያዩ የሃይማኖት አመለካከቶች…………… 242

ምዕራፍ ዐሥራ አንድ የተሐድሶ መሥራቾች……………….. 255

ምዕራፍ ዐሥራ ሁለት የ21ኛው ዘመን ተሐድሶዎች

(መናፍቃን)………………………………. 269

ምዕራፍ ዐሥራ ሦስት የመንፈስ ቅዱስ ተቃዋሚዎችና መናፍቃን

የሚሉትንና መልሶቻቸው…………….. 274

ሀ. ሲሞን መሠርይ…………………………………………… 276

ለ. ቫለንቲኑ…………………………………………………….. 278

ሐ. ሞንታኒዝም……………………………………………….. 279

መ. አርዮስና መንፈቀ አርዮስ………………………………… 282

ሠ. መቅዶንዮሳውያን………………………………………….. 296

ረ. የያህዌ ምስክሮች………………………………………….. 299

ሰ. ኢየሱስ ብቻ………………………………………………… 306

ሸ. ሞርሞኒዝ…………………………………………………… 311

ምዕራፍ ዐሥራ አራት ዕውቀትና ጥበብ መገኛው

ከእግዚአብሔር ነው……………………. 323

ዋቢ መጻሕፍት…………………………………………………………. 334

ከአሁን በፊት በአዘጋጁ የታተሙ መጻሕፍት……………………….. 336

መቅድም

በስመ አብ ወወልድ ወመንፈስ ቅዱስ አሐዱ አምላክ

መናፍቃን ቅዱስ መጽሐፍን ትርጉሙን እያጣመሙ በመጻፍ ምእመናንን የሚያደናግሩበትን ሐሰተኛ ትምህርት ለማጋለጥ ያህል የኢትዮጵያ ኦርቶዶክስ ተዋሕዶ ቤተ ክርስቲያን በመጽሐፍ ቅዱስ ላይ ያላትን ጽኑ እምነትና የቀና ሃይማኖት ከዚህ በታች ባሉት ዋና ዋና ማስረጃዎች ይመልከቱ፡፡

መጽሐፍ ቅዱስ የፈጣሬ ዓለማትን፣ አምጻኤ ዓለማትን፣ የእግዚአብሔርን አምላክነት፣ የመንግሥቱን ዘለዓለማዊነትና ሀልዎቱን የምንረዳበት፣ የሃይማኖት ትምህርት መማሪያና ጥንተ መጻሕፍት ነው፡፡ ነቢየ እግዚአብሔር ልበ አምላክ ቅዱስ ዳዊት “ውስተ ርእሰ መጽሐፍ ተጽሕፈ በእንቲኣየ/ የመጻሕፍት ራስ በሆነው በቅዱስ መጽሐፍ ስለ እኔ ተጽፏል” እንዳለ መዝ. 39÷7

መጽሐፍ ቅዱስ የእግዚአብሔር ቃል ነው፡፡ እግዚአብሔር ራሱ በቃሉ በነቢያት ላይ አድሮ የተናገረው፡፡

ሀ. “እግዚአብሔር ይህን ቃል ሁሉ እንዲህ ብሎ ተናገረ፡፡ … ከእኔ በቀር ሌሎች አማልክት አይሁኑልህ፡፡”  ዘጸ. 20÷1-17 ይመልከቱ

ለ. “በብዙኅ ነገር ወበብዙኅ መክፈልት አይድዐ እግዚአብሔር ለአበዊነ በነቢያቲሁ እምትካት፡፡ ወበደኃሪሰ መዋዕል ነገረነ በወልዱ ዘረሰዮ ወራሴ ለኵሉ ወቦቱ ፈጠሮ ለኲሉ / ከጥንት ጀምሮ እግዚአብሔር በብዙ ዓይነት በብዙ ጎዳና ለአባቶቻችን በነቢያት ተናግሮ ሁሉን ወራሽ ባደረገው ደግሞም ዓለማትን በፈጠረበት በልጁ በዚህ ዘመን መጨረሻ ለእኛ ተናገረን” ዕብ. 1÷1

ሐ. “ዘአቅደመ ነጊረ በአፈ ነቢያቲሁ ወበመጻሕፍቲሁ ቅዱሳት/ በነቢያቱ አፍ በቅዱሳት መጻሕፍት አስቀድሞ እንደተናገረ” ሮሜ 1÷2

  • እግዚአብሔር ለሊቀ ነቢያት ሙሴ እንዲህ አለው፡፡ እኔ ነኝ ያለና የሚኖር፤ ለእስራኤል ልጆች እንዲህ ትላቸዋለህ፡፡ ያለና የሚኖር ወደ እናንተ ልኮኛል፡፡ ዘጸ. 3÷14
  • የእስራኤል ቅዱስ ሠሪውም እግዚአብሔር እንዲህ ይላል፡፡ ምድርን እኔ ሠርቻለሁ ሰውንም በእርሷ ላይ ፈጥሬአለሁ፡፡ ሰማያትን በእጀ ዘርግቻለሁ፤ ሠራዊታቸውንም ሁሉ አዝዣለሁ፡፡ ኢሳ. 45÷11-12
  • “እስመ ኢኮነ ስውረ ዘኢይትአመር ዳእሙ ጥዩቀ አእመርናሁ በኦሪት ወበነቢያት ከመ ውእቱ አኃዜ ኩሉ ወስሉጥ ላዕለ ኵሉ ፍጥረት ማለት የማይታወቅ ስውር /ድብቅ/ የተሸሸገ አይደለምና በኦሪትና በነቢያት በጎላ በተረዳ እውነቱን አውቀነዋል፡፡ ሁሉን የያዘ እንደሆነና በሁሉም ላይ ሥልጣን ያለው እንደሆነ አውቀነዋል” እንዳሉ ሐዋርያት / ድድስቅልያ አልቦ አመክንዮ የተባለውን አንቀጽ ተመልከት፡፡

እኛም ኢትዮጵያውያን “ውስተ ርእሰ መጽሐፍ ተጽሕፈ እኛም ኢትዮጵያውያን “ውስተ ርእሰ መጽሐፍ ተጽሕፈ በእንተ ኢትዮጵያ” የመጻሕፍት ራስ በሆነው በቅዱስ መጽሐፍ ስለ ኢትዮጵያ ተጽፏል በማለት የነበረውን እውነተኛ ታሪክ፤ አሁን ያለውንና ለወደፊትም የከፋ ችግርና ክሕደት ሊከሰት ይችላል ብለን የሰጋነውን ሁሉ በእውነት ላይ ተመርኩዘን ጽፈናል፡፡

  • የኢትዮጵያ ኦርቶዶክስ ተዋሕዶ ቤተ ክርስቲያን እምነት ተከታዮች ሆይ መናፍቃን እውነት ክርስትናንና ክርስቶስን ለመስበክ ከሆነ ብዙው የዓለማችን ክፍል የክርስቶስን መወለድ፣ በማየ ዮርዳኖስ መጠመቁ፣ በቀራንዮ ተሰቅሎ መሞቱ፣ በጐልጎታ መቀበሩ፣ በሦስተኛው ቀን መነሣቱ፣ እንዲሁም ማረጉ፣ ዳግም ምጽአቱ ያላመነና ሃይማኖት የሌለው ሕዝብ ነው ለምን ያንን ሕዝብ አያስተምሩም? ለምን በኢትዮጵያ ላይ ዓይናቸውን ተከሉ? ወገኔ ንቃ !

“ይገንዩ ቅድሜሁ ኢትዮጵያ” ኢትዮጵያውያን በፊቱ ይሰግዳሉ፡፡

መዝ. 71÷9

ነቢየ እግዚአብሔር ልበ አምላክ ቅዱስ ዳዊት ይህን ቃል የተናገረው ቅድመ ልደተ ክርስቶስ ከአንድ ሺህ ዓመት በፊት፤ ከዛሬ ሦስት ሺህ ዓመት በፊት ማለት ነው፡፡

“ኢትዮጵያውያን በፊቱ ይሰግዳሉ” የሚለው ቃል ኢትዮጵያ ምን ጊዜም ቢሆን አምልኮተ እግዚአብሔርን ስትፈጽም የነበረችና የኖረች ለወደፊቱም ስትፈጽም የምትኖር ቅድስት ሀገረ እግዚአብሔር መሆኗን የሚያረጋግጥ እውነታ ነው፡፡ ኢትዮጵያውያን ጥንት ቅድመ ልደተ ክርስቶስ ሕገ ልቡናን፤ ሕገ ኦሪትን፣ ድኅረ ልደተ ክርስቶስም ሕገ ወንጌልን ተቀብለው አምልኮተ እግዚአብሔርን ሲፈጽሙ የኖሩ ሕዝቦች ነው፡፡

ኢትዮጵያውያን ከሕገ ልቡና እና ከሕገ ኦሪት በኋላ ሕገ ወንጌልን ከማንም  ቀድመን  በመቀበል የዘመነ ክርስትና ቀደምት የእምነት መሠረት ነን፡፡ ልበ አምላክ ቅዱስ ዳዊት “ ነገሥተ ሳባ ወዐረብ ጋዳ ያመጽኡ” የዓረብና የሳባ ነገሥታት እጅ መንሻን ያቀርባሉ፡፡ መዝ. 71$10 በማለት የመሰከረልን ኢትዮጵያውያን ነን፡፡ መድኅነ ዓለም ኢየሱስ ክርስቶስ በቤተ ልሔም ዋሻ በከብት በረት በተወለደበት ጊዜ የፈጣሪን እጅ መንሻ ይዘው ከቀረቡት፤ ከመላእክትና ከእረኞች ጋር ስብሐት ለእግዚአብሔር በሰማያት ወሰላም በምድር ሥምረቱ ለሰብእ ብለው ካመሰገኑት ፍጡራን መካከል በእርግጠኝነት ተገኝተንበታል፡፡ ከዚያም ዓለም በሙሉ ስለ ክርስቶስ መወለድ ምንም ባልሰማበትና በአረማዊነት በነበረበት በመጀመርያው መቶ ክፍለ ዘመን በ34 ዓ.ም በዓለ ኀምሳን ለማክበር ወደ ኢየሩሳሌም የሔደው ጃንደረቫ በወንጌላዊው ቅዱስ ፊሊጶስ ስብከት አምኖና ተጠምቆ ወደ ቅድስት ሀገሩ ኢትዮጵያ በመመለስ የመጀመሪያው ሐዋርያ  ሆነ፡፡ የሐዋ.ሥ 8÷39

በመሆኑም ቅድስት ሀገር ኢትዮጵያ የሃይማኖትና የስልጣኔ፣ የቋንቋና የታሪክ፤  የመልካም ሥነ ምግባርና የጥሩ ባህል  መዲና መሆኗ ለማንም ግልጽ ነው፡፡

ይሁን እንጂ በማንነታችንና በሃይማኖተኝነታችን የታወቅን፤ በቅዱሳት መጻሕፍት የተመሰከረልን ማለትም “በውኑ ኢትዮጵያዊ መልኩን ወይስ ነብር ዥንጉርጉርነቱን ይለውጥ ዘንድ ይቻላልን? ት.ኤር. 13÷23 ተብሎ የተነገረለትን ቅዱስ ሕዝብ የዘመን መጨረሻ ሆነና በየጊዜው የሚነሱ ሃይማኖት ለዋጮች መናፍቃን “ላም ባልዋለበት ኩበት ለቀማ እንዲሉ አበው” ባልዋሉበት፤ በማያውቁትና ባልተማሩት ክርስትናን እናስተምራለን እያሉ ቅድስት ቤተ ክርስቲያንን ሲያውኳትና ምእመናንንም ሲያደናግሩ ይታያሉ፡፡

ስለዚህ “ተሰአሎ ለአቡከ ወይነግረከ” አባትህን ጠይቀው ይነግርኻል ዘዳ. 32÷7፡፡ ጥንታዊት፤ ታሪካዊት፤ ሐዋርያዊት፤ ብሔራዊት፤ ርትዕት ቅድስት የኢትዮጵያ ኦርቶዶክስ ተዋሕዶ ቤተ ክርስቲያን የእነ አርዮስን፤ የእነ ንስጥሮስን፤ የእነ መቅዶንዮስን፤ የእነ ሉተርንና ተከታዮቻቸውን ኑፋቄ ድል በመንሣት፤ ከዓላውያን ነገሥታት ጋራ ታግላ በማሸነፍ  እዚህ ዘመን መድረሷን እያረጋገጥን ለወደፊቱም እንኳ መናፍቅ ሌላም “በስሜ ይመጣሉና ተጠንቀቁ ኢየሱስ ከቤት አለ ቢሏችሁ አትግቡ ከውጭ አለ ቢሏችሁ አትውጡ” ፡፡ ማቴ. 24÷24 ተብሎ ስለተነገረን አንደነግጥም፡፡ ስለሆነም የመናፍቃን ክህደታቸውን የእኛ እውነተኛውን የተዋሕዶ ሃይማኖት እምነትና ቀኖና በንጽጽር ተቀምጧል፡፡

ስለዚህ ካህናትና ምእመናን የመናፍቃንን ክህደታቸውንና ውሸታቸውን ይረዱበት ዘንድ እውነተኛዋን የኢትዮጵያ ኦርቶዶክሳዊት ተዋሕዶ የክርስትና ሃይማኖት በበለጠ ታጠናክሩበት  ዘንድ በማለት ኢትዮጵያዊ ሃይማኖቱን፤ ነብር ዝንጉርጉርነቱን ይለውጥ ዘንድ ይችላልን? “ተሰአሎ ለአቡከ ወይነግረከ” አባትህን  ጠይቀው ይነግርኻል ዘዳ. 32÷7፡፡ በሚል ርእስ ከቅዱሳት መጻሕፍት ያለውን ሃይማኖታዊ ሐቅ በመጥቀስ አቅርበነዋል፡፡

መልካም ንባብ 

አባ ሳሙኤል

በኢትዮጵያ ኦርቶዶክስ ተዋሕዶ ቤተ ክርስተያን

የልማትና ክርስቲያናዊ ተራድኦ ኮሚሽን ሊቀ ጳጳስ

2010 ዓ.ም

 

 

 

፫. መዝምር ዘምኵራብ፦ ቦአ ኢየሱስ ምኵራበ አይሁድ
ምስባክ፦ እስመ ቅንዐተ ቤትከ በልዐኒ፤ ትዕይርቶሙ ለእለ
ይትዔሩከ ወድቀ ለዕሌየ፤ ወቀጻዕክዋ በጾም ለነፍስየ።
(መዝ 68፥9-10)።
ምንባብ፦ ዮሐ 2፥12 ፍጻሜ

‹‹የአባቴን ቤት የንግድ ቤት አታድርጉት፤›› ቁ 16

ጌታችን መድኃኒታችን ኢየሱስ ክርስቶስ በእስራኤል ምድር እየተዘዋወረ በሚያስተምርበት ወቅት በአንድ የፋሲካ በዓል በሚከበርበት ጊዜ ከደቀ መዛሙርቱ ጋር በዓሉን ለማክበር ወደ ኢየሩሳሌም ወጣ። ሰዎች በዓሉን ለማክበር ወደ ኢየሩሳሌም ይወጡ የነበረው የእግዚአብሔርን ረድኤትና በረከት ለማግኘት ነበር። ጌታችን ግን በዓሉን ለማክበር ወደ ኢየሩሳሌም የወጣው ለሕዝቡ አርአያና ምሳሌ ለሕዝቡ ለመሆን እንጂ ለእርሱ አስፈልጎት አልነበረም።
ጌታችን ኢየሱስ ክርስቶስ ወደ ቤተ መቅደስ ለመግባት ወደ ግቢው በደረሰ ጊዜ በግቢው ውስጥ የተለያዩ ነጋዴዎች ተሰብስበው በሬዎችን፣ በጎችንና ርግቦችን በመሸጥና በመለወጥ ላይ ተሰማርተው አየ። ነጋዴዎቹ ገዢዎቹን ወደዚህ፤ ወደዚያ ሂዱ በማለት ገበያው ደርቶ ጫጫታው በርክቶ ቦታው የጸሎት ቤት ሳይሆን የደራ ገበያ መስሎ ነበር የሚታየው።

ቦታው እንዴት ገበያ ሊሆን ቻለ? ብለን ልንጠይቅ እንችላለን። ከእስራኤል ሀገር ውጭ በልዩ ልዩ አገሮች የሚኖሩ አይሁድ የፋሲካን በዓልና ሌሎችን በዓላት ለማክበር ወደ ኢየሩሳሌም ይመጡ ነበር። እነዚህ የአይሁድ ምእመናን ደግሞ በአይሁድ እምነት መሠረት የእግዚአብሔር በረከት ለማግኘት በአይሁድ እምነት መሠረት የእግዚአብሔር በረከት ለማግኘት ለመሥዋዕት የሚቀርቡትን በሬዎች፣ በጎችና ርግቦች ማቅረብ ነበረባቸው። እነዚህን ለመሥዋዕት ያስፈልጉ የነበሩትን እንስሳት እጅግ ሩቅ ከሆኑ ከሚኖሩበት አገር ለማምጣት ፈጽሞ ስለማይቻል ከዚያው ከኢየሩሳሌም መግዛት ነበረባቸው። ስለዚህ ነበር ከሩቅ አገሮች ለሚመጡ ምእመናን የኢየሩሳሌም ነጋዴዎች በሬውን፣ በጉንና ርግቡን ለመሸጥ በቤተ መቅደሱ አጥር ግቢ ውስጥ ተሰብስበው ገበያ አድርገው የነበሩት።
በሌላ በኩል ደግም ቤተ መቅደስን ለመርዳት የአስተዋጽኦ ገንዘብ ለመሰጠት የእስራኤል ገንዘብ (ሼከል) ያስፈልግ ነበር። የውጭ አገር ገንዝብ ወደ ቤተ መቅደስ ማስገባት አይፈቀድም ነበር። ታዲያ ከውጭ አገር ይመጡ የነበሩ አይሁድ ከውጭ አገር ያመጠት የውጭ አገር ገንዘብ ወደ እስራኤል ገንዘብ (ሼክል) መለወጥ ነበረባቸው። ስለዚህ እጅግ የበዙ ገንዘብ ለዋጮች በቤተ መቅደሱ አጥር ግቢው ውስጥ ጠረጴዛዎቻቸውን ዘርግተው ገንዝብ ይለውጡ ነበር። በዚህ ሁኔታ በቤተ መቅደሱ ግቢ ውስጥ የደራና የተጧጧፈ ንግድ ይካሄድ ነበር።

በዚህ ሁሉ ነገር ቤተ መቅደሱ የአምልኮ ቦታ መሆኑ ቀርቶ የደራ ገበያ ሆኖ ነበር። ቦታው በምንም መንገድ መንፈሳዊ ስሜትና የጸሎት መንፈስ አይታይበትም ነበር። ስለዚህ ጌታችን ኢየሱስ ክርስቶስ ‹‹ የአባቴን ቤት የንግድ ቤት አታድርጉት፤›› በማለት ጅራፍ አበጅቶ በዚያ በንግድ ላይ የተሠማሩትን ሁሉ እየገረፈ አስወጣቸው። ከብቶቻቸውንም ሁሉ ከቤተ መቅደስ ውጭ አባረረ። የገንዘብ ለዋጮችንም ጠረጴዛዎች ገለባበጠ።

‹‹ የአባቴን ቤት የንግድ ቤት አታድርጉት፤›› ቤተ መቅደስ የአማኞች ወይም የኛው የራሳችን ልብ ምሳሌ ነው። ጌታችን ያን ቤተ መቅደስ የሌባ ዋሻ፣ የቀማኞች መሸሻ ሆኖ እንዳገኘው ወደ እኛ ልብ ቢመለከት ምን መስሎ ይታየው ይሆን? ልዩ ልዩ የኃጢአት ሸቀጥ መከማቻ መጋዘን ሆኖ ሊገኘው ይችላል። ታዲያ በዚያ ቤተ መቅደስ ሲሸጡ ሲለውጡ የተገኙ ሰዎች ምን ተብለው ነበር የታዘዙት? ያን ሁሉ ሸቃጣ-ሸቀጥ ማውጣት (ማስወገድ) እንደነበረባቸው ታዘው ነበር። እኛም በልባችን መጋዘን ውስጥ የተከማቸውን ልዩ ልዩ የኃጢያት (የበደል) ዓይነት፣ ክፉትን፣ ተንኮልን፣ ምቀኝነትን፣ ትዕቢትን፣ ክዳትን፣ ስርቆትን፣ ስስትን፣ ስካርን፣ አመንዝራነትን፣ በሐሰት መመስከርንና የመሳሰሉትን ሁሉ አውጥተን መጣልና ልባችንን ማጽዳት ይፈለግብናል። ጌታችን መድኃኒታችን ኢየሱስ ክርስቶስ በኢየሩሳሌም ያደረገውን የቤተ መቅደስ ማጽዳት ዛሬም በእኛ ጊዜ በዚህ ቦታ ሊያደርገው ይችላል። ዛሬም ጌታ ‹‹የአባቴን ቤት የንግድ ቤት አደረጋችሁት›፣ አታድርገው ሊለን ይችላል። ጌታችን ይህን ሊለን የሚችልው ምናልባት ወደ ቤተ ክርስቲያን መጥተን ወደ እግዚብሔር በመጸለይና ልዑል አግዚአብሔርን በማምለክ ፈንታ ዓለማዊ ነገር እያሰብን፣ ዓለማዊ ሥራን ለመሥራት ሰውን ለመጉዳይ ፕላን የምናወጣ ከሆነ ነው፣ ከተቀያየምናቸውም ጓደኞቻችን ጋር ለመታረቅና ‹‹ይቅር ለእግዚአብሔር›› ለመባባል ቁርጥ የሕሊና ሐሳብ ከአላደረግን እንዲሁም ከላይ የተጠቀሱትን የኃጢአት ዓይነቶች ከልባችን ካላወጣን ጌታችን አምላካችን ጸሎታችንን የማይሰማ ብቻ ሳይሆን ‹‹የአባቴን ቤት የንግድ ቤት አደረጋችሁት›፣ ነው የሚለን።

እንደ እውነቱ ከሆነ ዛሬም በየክብረ በዓሉ በቤተ ክርስቲያን አካባቢ ልዩ ልዩ የንግድ ሥራ ሲካሄድ ነው የምናየው። እንዲሁም በቤተ ክርስቲያን ውስጥና አካባቢ ብዙ የንግድ ሥራ፣ ብዙ የሙስና ሥራዎች፣ የተለያዩ የኃጢአት ሥራዎች ሲሠሩ ይታያሉ። በዚህ ሥራዎችን፣ ጌታችን አምላካችን ጅራፍ ይዞ እንዲመጣ እየጋበዝነው እንገኛለን። በርግጥ ጌታችን በዛሬው ጊዜ ግልጥ የሆን ጅራፍ ይዞ ላይመጣ ይችላል። ጌታ እኮ ብዙ በዓይን የማይታዩ የተለያዩ ጅራፎች አሉት። 1ኛ. በሀገር ላይ ረሃብንና ውኃ-ጥምን፣ 2ኛ. የተለያዩ መድኃኒት የማይገኝላቸው በሽታዎችን፣ 3ኛ. በጐርፍ መጥለቅለቅንና የመሬት መናወጥን፣ እንዲሁም 4ኛ. ርዕደ መሬትን ሊያመጣብን ይችላል። እነዚህ ሁሉ የጌታ ጅራፎች ናቸው። ስለዚህ ከእነዚህ ሁሉ ቅጣቶች አንዱም እንደይደርስብን እያንዳንዳችን መጠንቀቅ አለብን።

በእርግጥ ከጥንት ጊዜ ጀምሮ ዛሬም በቤተ ክርስቲያን ቅጽር ግቢ ውስጥ ችግረኞችንና ድሆችን ለመርዳት የተለያየ የበጎ አድራጎት ሥራዎች ለምሳሌ እንደ ሰንበቴና የጽዋ ማኅበር ይካሄዳሉ። ከዚህም ሌላ ሽማግሌዎች የተጣሉ ሰዎችን የሚያስታርቁት በቤተ ክርስቲያን ቅጽር ግቢ እየተሰበሰቡ ነው። እንዲሁም ለማኅበራዊ አገልግሎት የሚረዱ ወርኃዊ የዕድር ስብሰባዎቸ የሚካሄዱት በቤተክርስቲያን ቅጽር ግቢ ውስጥ ነው። ቤተ ክርስቲያን የሰላምና የፍቅር፣ የግብረ ሠናይና የበጎ አድራጎት ማእከል ስለሆነች እንደነዚህ ያሉት ስብሰባዎች በቤተ ክርስቲያን ቅጽረ ግቢና አካባብ መሆናቸው የሚደገፍ ነው።

አባ ሳሙኤል
በኢትዮጵያ ኦርቶዶክስ ተዋሕዶ ቤተክርስቲያን
ልማትና ክርስቲያናዊ ተራድኦ ኮሚሽን ሊቀጳጳስ
አዲስ አበበ

ሙሉ መጽሐፉን እዚህ በመጫን ያውርዱና ያንብቡ Leadership

የብፁዕነታቸው መልእክት

በስመ አብ ወወልድ ወመንፈስ ቅዱስ አሐዱ አምላክ አሜን!

የኢትዮጵያ ኦርቶዶክስ ተዋሕዶ ቤተ ክርስቲያን የጠቅላይ ቤተ ክህነት መምሪያ ኃላፊዎች፣ የአኅጉረ ስብከት ሥራ አስኪያጆችና ዋና ጸሐፊዎች የልማት መምሪያ ኃላፊዎች  እንዲሁም  በማንኛውም ደረጃ የምትገኙ የቤተ ክርስቲያኒቷ የሥራ አስፈጻሚዎች በሙሉ ይህች ሐዋርያዊት፣ ታሪካዊትና ዓለም አቀፋዊት የሆነችው ቤተ ክርስቲያን በዚህ ረጅም የታሪክ ኩነቶች ውስጥ በሃይማኖት መሪዎቿ ጥበብና የመንፈስ ብርታት፣ ብቃትና ጽናት እንዲሁም በጠንካራ አገልግሎትና ጸሎት፣ በየዘመናቱ የሚገጥማትን እጅግ ፈታኝና አስቸጋሪ ፈተናዎችን አልፋ ለዚህ አሁን ላለችበት እንድትበቃ የበኩላቸውን አስተዋጽኦና ድረሻ ተወጥተው እምነታቸውንና፣ ታሪካቸውን ለሀገርና ለእኛ አስረክበዋል፡፡

አሁን ያለንበት ዘመን እጅግ ፈጣን ለውጦች የሚካሄዱበት ጊዜ ብቻ ሳይሆን ውስብስብ ችግሮች አብሮ የሚፈጠሩበት በመሆኑ ዘመኑ የሚጠይቀውን የአመራር ጥበብና ክህሎት  በራሱ እጅግ የጠለቀ እውቀትና ብልሀት እንዲሁም በመንፈስ ቅዱስ መታገዝን የሚጠይቅ በመሆኑ የመሪነትን ተግባር አስቸጋሪ አድርጎታል፡፡

በዚህ ደግሞ ቤተ ክርስቲያኗ በዘመናት ውስጥ አልፋ የመጣችበት ጥንካሬዎቿ ዛሬ ዛሬ በፈታኝ ሁኔታ ውስጥ እንደምትገኝ ነባራዊው ገጽታ የሚያሳየው እውነታ ነው፡፡ ይሁን እንጂ በዚህ ፈታኝ ወቅት እኛ መንፈሳዊ መሪዎች አውንታዊውን ሆነ አሉታዊውን ተግባር በማከናወን ረገድ የራሳችን ሚና በመጫወት ላይ እንገኛለን፡፡ Continue Reading

ምዕራፍ ዐሥራ ስድስት

በ9ኙ የመንፈስ ቅዱስ ተቃዋሚዎችና መናፍቃን መልሶቻቸው ላይ የተሰጠ ግልጽ መልስ

The Work of the Holy Sprit.pdf

Cover Page“ወበእንተሂ ዘመንፈስ ቅዱስ ኢንፈቅድ አኀዊነ ትኩኑ አብዳነ አላ ታእምሩ፡፡ ትካትኒ እንዘ አረሚ አንትሙ ተአምሩ ከመ አማልክተ በአማነ ታመልኩ ወአጣዖክሙ ወተጻእጻእክሙ ወተሐውሩ ኀበ ወሰዱክሙ፡፡ ወንድሞቻችን ስለ መንፈስ ቅዱስ በምታስቡትም አላዋቆች ልትሆኑ አንወድም እንድታውቁ እንጂ፡፡ ቀድሞም እኮ እናንተ አረማውያን ሳላችሁ ዲዳዎችን ጣዖታት ታመልኩ እንደ ነበር ታውቃላችሁ ጣዖትም አምልካችሁ ነበር ረክሳችሁም ነበር፤ ወደ ወሰዱአችሁም ትሔዱ ነበር፡፡” (1ኛ ቆሮ. 12÷1)፡፡

1. ቅዱስ ጳውሎስ ይህን ሲጽፍ፣ ሲናገር፣ ሲያስተምር ስለ መንፈስ ቅዱስ በምናስብበት፣ በምንናገርበት፣ በምንጽፍበት፣ በምናስተምርበት ጊዜ ሁሉ ጥንቃቄ እንድናደርግ ትምህርትና ምክር ይሰጣል፡፡ ቀደም ሲልም በቤተ ክርስቲያን ከተሰበሰቡት፣ ቤተ ክርስቲያን ከምታውቃቸው ታላላቅ ጉባኤያት አንዱ በ380 ዓመተ ምሕረት አካባቢ የሆነው በቁስጥንጥንያ የተሰበሰበውና መንፈስ ቅዱስ ከአብና ከወልድ ያንሳል የሚል የኑፋቄ የክሕደት ትምህርት በቤተ ክርስቲያን የዘራውን የቁስጥንጥንያውን ሊቀ ጳጳሳት መቅዶንዮስን ለማውገዝ የተሰበሰበው የቁስጥንጥንያ ጉባኤ ነበር፡፡ መናፍቁን አውግዞ፣ ከሹመቱ ሽሮ፣ “ሕያው ማኅየዊ ጌታ በሚሆን በመንፈስ ቅዱስ እናምናለን” የሚል የትምህርተ ሃይማኖት ውሳኔ ሰጥቶ ተነሥቶአል፡፡

2. ትምህርቱም ቀደም ብሎ በ328 ዓመተ ምሕረት በኒቅያ ጉባኤ ከተወሰነው፤ ወልድ ዋሕድ፤ ከሚለው ትምህርት ጋራ በቤተ ክርስቲያን ጸንቶ እስከ ዛሬ አለ፡፡ በኒቅያ ጉባኤ፤ ወልደ አብ ዋሕድ፤ አንድ የአብ ልጅ፤ ተብሎ ወልድ ከአብ መወለዱ እንደ ተገለጠ፤ በቁስጥንጥንያ ጉባኤም ዘሠረጸ እምአብ ከአብ የሠረጸ ተብሎ ስለ መንፈስ ቅዱስ ተነግሯል፡፡ ይህ ውሳኔ “መንፈሰ ጽድቅ ዘይወፅእ እምኀበ አብ ከአብ የሚወጣ የእውነት መንፈስ፤” ባለው በጌታ ቃል ላይ የተመሠረተ የጸና እንጂ ልብ ወለድ አነጋገር አይደለም፡፡ (ዮሐ. 15÷26)፡፡ “ዝንቱ ውእቱ ወልድየ ዘአፈቅር የምወደው ልጄ ይህ ነው” የሚለው የአብ ምስክርነት ወልድ ከአብ መወለዱን እንደሚያስረዳ (ማቴ. 17÷5)፡፡ “ከአብ የወጣ የእውነት መንፈስ፤” የሚለው የጌታ ምስክርነትም መንፈስ ቅዱስ ከአብ ብቻ መሥረጹን ለቤተ ክርስቲያን ሲያስረዳ ሲመሰክር ሲያስተምር የሚኖር ቀዋሚ ምስክር ነው፡፡ ማንም ሊቃወመው ሊያስተባብለው አይችልም፡፡ Continue Reading

አንድ ታላቅ አባት አሉ፡፡ በኑሮአቸው ሁሉ ያሳለፏቸውን ተሞክሮዎች ሁል ጊዜ ለወጣቶች ማጫወት ያስደስታቸዋል፡፡ ታዲያ ወደ ወጋቸው ከመግባታቸው በፊት ‹‹እሰይ! እንኳን ተወለዳችሁ፤ እግዚአብሔር ያሳድጋችሁ!›› እያሉ ይመርቃሉ፡፡ እውነት ነው፡፡ ማንኛውም ወላጅ የወለደው ልጁ አድጐ ለቁም ነገር እንዲበቃ የዘወትር ምኞቱ ነው፡፡ አበ ብዙኃን አብርሃምም ልጁን ይስሐቅን ጡት ባስጣለበት ቀን ታላቅ ግብዣን ማድረጉ ለዚህ ምልክታችን ምስክር ነው፡፡ ‹‹አብርሃምም ይስሐቅን ጡት ባስጣለበት ቀን ትልቅ ግብዣን አደረገ›› እንዲል /ዘፍ. 21÷8/፡፡ ቅዱስ መጽሐፍ አብርሃም ይስሐቅን ጡት እንዳስጣለ ይነግረናል እንጂ ይስሐቅ በራሱ ጡት አልጣለም፡፡ ከዚህ የምንረዳው ሥጋዊ ወላጆቻችን ለመውለድ ብቻ ሳይሆን ለማደጋችንም ጭምር እንደሚያስቡና ግድ እንደሚላቸው ሲሆን በመንፈሳዊው ዓለምም በጥንተ ተፈጥሮም ሆነ በዐዲስ ተፈጥሮ የወለደን እግዚአብሔር እኛን ለማሳደግ ከሕፃንነት ወራታችን ጀምሮ እንደሚደክምልን ነው፡፡ Continue Reading

ይህ መጽሐፍ ስለ ኦርቶዶክስ ተዋሕዶ ትምህርተ ሐይማኖት፣ ስለ ቤተክርስቲያን ሕግ፣ ስለ ቅዱስ ሲኖዶስ ኃላፊነት አካላት እና አሰራር . . . የመሳሰሉ ብዙ ቁምነገሮች ያሉበት ስለሆነ አውርደው ቢያነቡት ይጠቀሙበታል በሚል በዚህ ገጽ ላይ አስቀምጠንላችኋል። የህንን church law (YETRMEW) በመጫን ሙሉ መጽሐፉን ያገኛሉ።

በአሁን ዘመን የቤተክርስቲያን ወጣቶች ከራሳቸውም ከውጭም በሚመጣ ፈተና ሊኖሩ የሚፈልጉትን እና መኖር ያለባቸውን ክርስቲያናዊ ሕይወት እንዳይኖሩ እያደረጋቸው መሆኑ ይታወቃል።

በመሆኑም ወጣቶች ከተለያዩ ፈተናዎች እራሳቸውን እንዲጠብቁ እና መኖር የሚገባቸውን ክርስቲያናዊ ሕይወት ይኖሩ ዘንድ የሚረዳቸውን መጽሐፍ በማዘጋጀት ይጠቀሙበት ዘንድ በዚህ ገጽ ላይ አስቀምጠናል። ይህንን Wetatnet   በመጫንም ሙሉ መጽሐፉን ታገኛላችሁ።

የመጽሐፉን ይዘት፡ Continue Reading